लम्जुङ, जेठ २३ नेपालले विनाशकारी भूकम्पको महाविपत्ति सामना गरिरहेको बेला केही समयअघि मधेशी जनाधिकार फोरमका अध्यक्ष उपेन्द्र यादवले आफ्नी छोरीको विवाह धुमधामका साथ गर्दा निकै आलोचित बन्नुपरेको थियो । ‘विपतका बेला पनि हाईफाई पार्टी गरेको’ भन्दै सामाजिक सञ्जलमा पूर्व परराष्ट्रमन्त्री समेत नेता यादवको निकै आलोचना भएको थियो ।
अहिले प्रधानमन्त्रीका अवैतानिक सल्लाहकारका रुपमा रहेकी मृदुला कोइरालाले पनि त्यस्तै कृयकलाप दोहोर्याएको भन्दै आलोचना शुरु भएको छ ।
कोइरालाले आफ्नो जन्मदिन मनाउँदै रेस्टुरेन्टमा रक्सी र बियरसहितको कोकटेल पार्टीको फोटो समाजिक सञ्जाल फेसबुकमा पोष्ट गरेपछि उनको आलोचना शुरु भएको हो ।
प्रधानमनत्री सुशील कोइरालासँग निकट रहेर काम गर्दै आएकी मृदुलाले न्युयोर्कबाट आएका साथीहरु तथा अग्रजहरुसँग आफ्नो जन्मदिन मनाएकी थिइन् । तर, समाजिक सञ्जालमा तस्विर पोस्ट भएपछि ‘बियर पार्टीभन्दा भूकम्पपीडितलाई सहयोग गरेको भए हुन्थ्यो,’ जस्ता आशयका साथ उनको आलोचना शुरु भएको छ ।
