८ हजार ५०० फिटको उचाइमा थाइ एयरको जहाजमा चरा छिर्यो

• काठमाडौँ, चैत ८ – थाइल्याण्डको बैंककबाट काठमाडौँ आउँदै गरेको थाइ एयरवेजको जहाजमा आज चरा छिरेको छ । जहाजमा चरा छिरे पनि सुरक्षित अवतरण गरिएको र यात्रुलाई कुनै किसिमको असर नपरेको त्रिभुवन अन्तर्राष्ट्रिय विमानस्थलले जनाएको छ । विमानस्थलका महाप्रबन्धक वीरेन्द्र श्रेष्ठले जहाज अवतरण गर्ने क्रममा विमानको दाँया इन्जिनमा चरा छिरेको जानकारी दिए । उहाँका अनुसार विमानस्थलबाट झन्डै १२ किमी दूरी ललितपुरको गोदावरीको आकाशमाथि करिब आठ हजार ५०० फिटको उचाइमा रहेको जहाजमा चरा पसेको थियो । महाप्रबन्धक श्रेष्ठले जहाजको इन्जिन प्राविधिकले मर्मत गरी परीक्षण गरिसकेकाले केही मिनेटमै सो जहाज यात्रु लिएर फर्कने जानकारी दिनुभयो । उडान भर्ने यात्रुको बोर्डिङ पास दिइसकिएको विमानस्थलले जनाएको छ ।