२९ चैत, एजेन्सी । भारतको छत्तीसगढ, झारखण्ड र ओडीशामा भारत सरकारले विशेष सतर्कता आदेश जारी गरेको छ । नक्शलवादीहरुले छत्तिसगढमा एकाएक आक्रमण गरेपछि भारत सरकारले सतर्कता बढाएको हो । सरकारले छत्तीसगढको सुकमा इलाकामा शनिबार माओवादीहरुले गरेको आक्रमणमा मारिएका सेनाको शव उठाउन नसकेको भन्दै ब्यापक आलोचना भएको छ । अहिले पनि आक्रमणमा ज्यान गुमाएका सैनिकका शव जंगलमै वेवारिसे अवस्थामा रहेको भारतीय सञ्चार माध्यमले जनाएका छन् । छत्तिसगढ इलाकामा माओवादीहरुको सम्मेलन चलिरहेको र त्यहाँ कम्तिमा ५०० माओवादी सहभागी रहेको भन्दै सरकारी सुरक्षा निकाय सचेत गराइएको छ । शनिबार माओवादीले सेनाको टुकडीमाथि आक्रमण गरेका थिए ।
मारिएका सैनिकको शव नियन्त्रणमा लिन कोशिस गर्ने सुरक्षाटोलीमाथि अर्को आक्रमण भएको थियो । माओवादीले सेनाका हतियार र पोषाक लुटेर लगेका छन् भने राति १ बजे सम्म सेनाको कारवाही चलेपनि शव भएको इलाकामा पुग्न सकेको छैन ।
