काठमाडौं, वैशाख १४– शनिबार र आइतबार दगातार गएको विनाशकारी भूकम्पका कारण देशभरका बैंक तथा वित्तिय संस्थाका सम्पूर्ण सेवा ठप्प भएका छन् । शनिबार मध्याह्नमा (११ः५६) बजे भुइँचालोपछि ठप्प भएको सेवा आइतबारसम्म पनि संचालनमा आएको छैन् । बैंक तथा वित्तिय संस्था बन्द हुनुका साथै एटिएम सेवा पनि ठप्प हुँदा आमनागरिकहरु मर्कामा परेका छन् । भूकम्पका कारण काठमाडौं उपत्यकालगायत मुलुकभर ठूलो क्षति बेहोरेका नागरिकहरुलाई बैंकिङ सेवा पनि ठप्प हुँदा झनै समस्या परेको छ । बिरामी भएर औषधी उपचार गर्न अस्पताल पुगेका मानिस र घरबाहिर बसेका नागरिकहरु ठूलो समस्यामा परेका छन् । भूकम्पका कारण आएको विषम परिस्थितिको मूल्याकंन गरी सेवा संचालन गर्न चाहेपनि विविध कारणले सम्भव नभएको बैंकहरु बताउँछन् ।
